Badirudi Reala izango dela jaisten dena...

6 puntu jokatzear daude oraindik ere, baina, badirudi Realak jaitsiera ia ia ziurtaturik duela igandean Osasunaren aurka 2-0 galdu ostean. Jende asko pasa den astean zehar aritu zen partida honi erreferentzia egiten, eta horien ustez, Osasunakoek Realari irabazten utziko zioten. Ez zen hala gertatu, ordea. Realak oso itxura kaxkarra erakutsi zuen Reyno de Navarra futbol zelaian, eta bazirudien Osasuna zela, Realaren ordez, puntuen beharra zuen taldea. Osasunak kritikak jasoko dituela argi dago, baina profesionaltasuna erakutsi zutela baita ere.Gauzak horrela, iruindarrek salbazioa ziurtatu dute, eta Realak mirari bat beharko luke salbatzeko.

Athletic-ek, bestalde, berebiziko garaipena lortu zuen San Mamesen Mallorcaren aurka. 1-0 izan zen azken emaitza, Urzaizek sartutako penalti bati esker, eta, esan daiteke, Reala atzean utzi dutela lehoiek behin betiko. 4 puntu daude bilbotarren eta donostiarren artean, eta 6 puntu gelditzen dira jokatzeke, beraz, sinestezina den zeozer gertatu ezean, Athletic salbatu egin dela badirudi.

Aratz futbol 7

Bukatu dira esperantza guztiak. Jadanik 3.mailarako jaitsiera ziurtatu dute Aratzekoek, igandean galdu ostean, gainera, sekulako jipoia jasoz. Esan beharra dago 6 pertsonarekin hasi zirela jolasten, eta partida jokatzen ari zen bitartean, jokalarietako bat lesionatu egin zela. Ondorioz, ezinezkoa izan zen porrota ekiditea. Jardunaldi bat falta da hirugarren ligaxka hau amaitzeko, eta dagoeneko azkeneko jardunaldiari begira jaitsiera ziurtatua dago.

9 puntu falta dira jokatzeko!

Hiru kasu erabat ezberdin jardunaldi honen ostean.Athletic-ek larunbatean 4-3 galdu zuen Zaragozaren aurka La Romareda futbol zelaian, eta puntu batera gerturatu zaio Reala. Honekin, jaitsiera postuak puntu bakarrera gerturatu zaizkio Athletic-i, eta, etxetik kanpo hiru gol sartzeak ez zion ezertarako balio izan.

Realaren kasuan, igandean ere beste garaipen bat lortu zuten Celtaren aurka,3 eta 1,eta honekin, galiziarrak hondoratu zituzten. Ia ezinezkoa zirudiena egiten ari dira Lotinarenak, eta salbazioa puntu bakarrera dute orain.

Osasunak ere berebiziko garaipena lortu zuen Levanteren etxean 1-4 gailendu ostean. Garrantzia handiko hiru puntu lortu, eta 40 punturekin, badirudi gelditzen diren hiru jardunaldiren batean punturen bat lortuz salbazioa esku-eskura dutela iruindarrek.

Aratz Futbol 7

Oraingoan ere huts. Pasa den igandean ere porrot mingarria jaso zuten Aratz taldekoek. Sekulako jipoia jasoaz gainera. Azken emaitza 14-3 izan zen Ciclos Iñaki taldekoen aurka. Oraingoan bai, badirudi jaitsiera ziurtaturik dutela Aratzekoek. Bi jardunaldi falta dira, baina gelditzen diren 6 puntuak lortuta ere, ia ezinezkoa da salbazioa.

Lau jardunaldiren faltan,euskal taldeak...

Igandean jokatutako jardunaldian hiru emaitza posibleak eman ziren gure euskal taldeentzat, hau da, porrota, berdinketa eta garaipena.

Hiruen artean puntu gehien dituenak jasan zuen porrota, Osasunak, alegia. 1-4 galdu zuen Villarrealen aurka, eta gauzak ez daude oso erabakita Iruña aldean. Hurrengo jardunaldietan punturen baten izugarrizko beharra dute gorritxoek.

Puntua, Athletic-ek erdietsi zuen San Mamesen Deportivoren aurka bana berdindu ostean. Puntu honekin, 4 puntutara dauzka jaitsiera postuak Bilboko taldeak.

Garaipena, aldiz, hiruetatik okerren doan taldearentzat, Realarentzat hain zuzen ere. Hil ala biziko garaipena izan zen gainera. 1-3 gailendu zitzaion Tarragonako Nastic-i, eta horrela, 18.postua lortu dute, Celta klasifikazioan berdinduz, 30 punturekin. Hala ere, jaitsiera postuetan jarraitzen dute donostiarrek

Aratz Futbol 7

Ez dago erarik. Jardunaldi honetan ere porrota, eta nolakoa gainera. Azkenaurreneko postuan zeudenen kontra 8-1 galdu ostean ia ezinezkoa dago salbazioa Aratzentzat. Gainera, hurrengo hiru jardunaldietan aurreneko hiru sailkatuen aurka aritu beharko dira, eta horrek are eta zailago egiten du puntuatzea. Matematikoki ordea oraindik posible da mantentzea. Esperantza ez al da galtzen den azkeneko gauza?

Puntua, oraingoan Bilbo aldera

Badirudi azken jardunaldiak ez direla oso aproposak izan euskal taldeentzat. Lehengo jardunaldian Osasuna izan bazen puntua lortu zuen bakarra, oraingoan Athletic-ek lortu zuen Huelvako Nuevo Colombino futbol zelaian husna berdindu ostean.Honekin 3 puntu ateratzen dizkio jaitsiera postuetan dagoen lehenengoari, Celtari, alegia.

Osasunak 3-1 galdu zuen Ono Stadium-en, Mallorcaren aurka. Partida kaxkarra jokatu zuten Zigandarenek eta honekin nahiko okertu zaizkie gauzak atzetik datozenak zertxobait gehiago gerturatu baitira.

Realaren kasuan, oraindik ere jaitsiera postuetan mantentzen dira pasa den larunbatean Barcelonaren aurka 0-2 Anoetan galdu ostean. Nahiko etorkizun zaila dute Lotinarenek, baina hala ere partida garrantzitsuak jokatzear dituzte oraindik ere.